– Me må ein tur ned for å sjå på stolen som Olav Asheim har laga, han er 92 år og har skåre ut ein nydeleg stol i tre, den blir ein av premiane til basaren, seier Gunnar Våge.
Me er i Nedstrand, ein nydeleg vinterfredag. Med steikande sol på blå himmel, glitrande hav og eit frostslør som dansar langs asfalten. Me har treft Gunnar Våge frå det frivillige brannkorpset i bygda og Inger Johanne Djursvoll frå Nedstrand Helselag på brannstasjonen. Me skal snakke om den årlege påskebasaren til helselaget som i år går til inntekt for nytt utstyr til brannkorpset.
– Ja, me må sjå på stolen først, den er ein gjev premie som heilt sikker mange vil sette pris på å vinne, nikkar Inger Johanne.
– Folk er utruleg flinke til å gi
Stolen står hos Joker Nesheim Hauge & Co og freistar, og der inne treff me butikkeigar Marianne Nesheim Hauge. Ho har vore med i Nedstrand Helselag i mange år, og legg kvart år loddbøkene til den årlege basaren fram i butikken, på eit lite bord med to stolar og gratis kaffi på bordet.
– Det er ekstra mykje givarglede denne gongen, sidan pengane går til eit spesielt formål, så langt lovar det godt, seier ho og viser oss to nesten fulle loddbøker.
– Folk er utruleg flinke til å gi. Eg og dottera mi var ute og selde lodd i går, og ikkje ein einaste person sa nei. Det er heilt fantastisk. Ei på jobben min på Tveit vidaregåande sa ho tippa me får inn 27.000 kroner, det hadde vore veldig kjekt å få så mykje, men me vågar ikkje spekulere for mykje, seier Gunnar blidt.