Av Sivert Ole Holten
NMK Vikedal stiller med heile ti førarar i den andre NM-runden i rallycross, som altså går på heimebane. Joakim Rønnevik i rallycross junior cup, Åsmund Holten i klassen inntil 1600 kubikk, Lars Ivar Øye, Kenneth Johansen, Daniel Holten og Ernst Holten Leifsen i inntil 2000 kubikk og Håvard Helland, Ingvar Auestad, Lars Reidar Frøyland og Bjørn Magne Moland Enge i den største klassen, med motorar over 2000 kubikk.
Då det sist vart køyrt NM-runde på Vikedal Motorbane var både Ernst, Kenneth, Bjørn Magne og Daniel i A-finale, og Daniel Holten gjekk heilt til topps i løpet. No er dei sugne på nye gode resultat.
– Planen er A-finale, er eit nesten samstemt svar frå dei sju som var samla til presse-konferanse på Vikedal Motorbane tysdag.
Ernst Holten Leifsen er likevel litt meir nøktern. Han stiller nemleg i ein heilt nybygd 2013 modell Citroen DS3, som nesten ikkje har vore køyrd.
– Under NM-opninga på Gardermoen var det motortrøbbel, no skal dette vere orden, og det skal bli moro å få køyrt til helga.
Bilen har han bygd sjølv, og han syns det er artig å ha ein heilt ny bil som folk kjenner.
– Karosserimessig er bilen nokså lik den som Petter Solberg køyrer i rallycross EM, sjølv om innmaten nok er noko ulik.
Heller ikkje Lars Reidar Frøyland vågar å love sin fans frå Tysvær at det blir A-finale. Han køyrer nemleg sin aller første NM-runde i rallycross og er nervøs.
– Eg er alltid nervøs, men no merka eg alt i dag at nervene kom då eg svinga oppover mot Vikedalsdalen og motorbanen.
Lars Reidar har nemleg investert i ein Volvo S40 for den største klassen, har køyrt eit løp i Vestlandsmesterskapet, som han vann.
– Ser fram til å køyre NM-runden på Vikedal Motorbane, og resultatet har avgjer om det blir fleire NM-rundar, elles blir det køyring på Vestlandet.
Bjørn Magne Moland Enge blei nummer fire sist det vart køyrt NM-runde i Vikedal, på søndag vil han på pallen.
– Målet er betre enn sist, så då må det bli pallen.
Det er Joakim Rønnevik, Åsmund Holten og Kenneth Johansen som ligg best an i sine klasser. Kenneth vil i A-finalen og i tillegg vere best av NMK Vikedal førarane i klassen.
-Målet er klart, på søndag skal både Daniel og Ernst vere bak meg på resultatlista.
Joakim Rønnevik har også eit klart mål, nemleg ei ny pallplassering, som det blei i første runde i rallycross junior cup, då han blei nummer to.
-Gler meg veldig til å køyre, og skal eg hengje med i samandraget til slutt må eg nok på pallen på søndag.
Åsmund Holten fyller 16 år i sommar, men køyrer rallycross saman med seniorane i ein Citroen Saxo. Bilen som broren Daniel vart Noregsmeister i 2010. Han har planen klar.
-Viktig å få ei god tid på tidskjøringa, då blir det køyring saman med dei raskaste førarane i første omgang, og det blir enklare å få ei god tid, som er viktig.