16. desember skal kommunestyret vedta budsjettet for neste år. Det kan bli eit budsjett kor alle får litt, og kor dei siste åras sjølvpålagte sparing, nå begynner å vise igjen.
Høgre og Arbeidarpartiet legg fram eit budsjett som viser at det skal satsast i søre-Tysvær, men at ny barnehage og skule ligg langt fram i tid. Dagens tilbod kan me utbygging og oppgradering halde i mange år til.
– Me ser det slik at tilbodet ved Tysværvåg barne- og ungdomsskule er slik at med oppgradering av utstyr og anna inventar, samt betre tilhøve for dei tilsette, vil haldast på eit godt nivå i mange år framover. Når det gjeld barnehagen vil me bygge ut, slik at ein får eit utvida tilbod allereie i neste periode, seier Ola S. Apeland, som la fram budsjettforslaget på vegne av Høgre og Ap.
Det betyr i klartekst at dei to partia legg vekk ny skule i søre-Tysvær i lang tid framover.
– Ikkje me
Det gjer ikkje dei andre partia. Dei vil også pusse opp dagens skule, men ser berre dette som eit ledd i prosessen med å få til ein ny skule. Det same gjeld for barnehagen.
– Me vil ha ny skule og barnehage i denne delen av kommunen. I framtida skal dette vere ein del av kommunen som får stor vekst, og me ser det ikkje teneleg å bygge ut dagens barnehage. Der er det for lite areal utomhus til dette. Difor har me andre alternativ enn det Apeland legg fram, seier Kristine Aurdal i si framlegging.
Stort sett einige
Politikarane i formannskapet er einige om mykje. Men når det kjem til søre-Tysvær blir det vanskeleg.