Sløvt og unøyaktig, men tre nye poeng

– Det er kanskje den dårlegaste kampen me har spelt i år, men heldigvis har me evna til å vinne slika kampar også. Dårlege og vanskelege val, feilpasningar og lite samhandling gjorde det vanskeleg for oss. Me prøvde å rette på det i pausen, men det var ikkje dagen for noko finspel, seier trenar Thormod Ness.
Han var likevel godt nøgd med tre nye poeng.
– Det me ser er at me nyttar oss av dei sjansane me får. Det er viktig, seier Ness.
Bursdagspakke
Gabriel Noriega skåra, som mot Falkeid det avgjerande målet på Frakkagjerd. På sin 18-årsdag fekk han servert 3-1-målet og plasserte ballen sikkert forbi banens beste spelar Pål Kaldheim.
– Det var ein kamp kor me sprang mykje i mellom og mista ballen alt for lett. men eg fekk ei gåve fem minuttar før slutt og det var herleg å sette ballen i mål. Nokon stor kamp av oss på midten var det ikkje. det var utruleg dyktige til å lage brott i spelet vårt, og me var heldige som vann denne kampen. Eg trudde eg hadde punktert kampen i det 85. minutt, men Kristian (Storesund) laga straffe, som dei skåra på minuttet etter. Litt trist for han, for han hadde eit par superedningar i dag, seier Noriega.
Tungt
Også Vemund Eskevik skåra på nytt for heimelaget. Også han meinte det var blytungt.
– Veit ikkje heilt kva det var som skjedde i dag, men me gjorde det vanskeleg for oss sjølv. men eg fekk eit mål, burde hatt eit til, men det gjer ikkje noko. Det viktigaste var tre poeng og ein ny siger, smiler Eskevik.

Andre resultat frå 5. divisjon:
Leirvik – Skånevik 4-3
Etne – Falkeid 4-1
Sauda – Karmsund 4-1