Byberg frå Rennesøy var lenge i tet og var på veg til det som tidleg såg ut til ein klar siger, spesielt etter at den hardaste konkurrenten Arnstein Nagell punkterte.
– Då blei det ei skikkeleg luke og eg sette kursen for Muslandsvåg. Der skulle me av vegen og inn i skogen. Eg fann ingen opning i gjerde og lurte på om eg hadde sykla feil. Så eg tok sykkelen på skuldra og klatra over eit gjerde, men fann ingen spor. Då tok forfølgjarane meg igjen og me fann ein port som var lukka, knekte ned den og fortsette. Då trudde eg at det var gjort. Heldigvis hadde eg meir kraft igjen, enn dei som kom bak og klarte å avgjere det heile, seier Byberg.
Det blei ein suveren siger på Byberg som kom i mål på 1.47,29 timar og var raus i omtalen av traseen etter rittet.
– Dette er nok den flottaste løypa eg har sykla i nokon gong. Hadde det ikkje vore for den der porten hadde det vore heilt perfekt, smilte vinnaren.
Beste tysværbu
Paul Magne Skjold kom i mål som beste tysværbu, eit godt stykke bak vinnaren.
– Eg hadde ikkje dempar på sykkelen og då blei det for tøft å henge på dei beste. Likevel var det ein flott tur og eg er nøgd med eigen innsats, smilte Skjold som kom i mål på 1.57,22.
Nils Olav Fjeldheim kom på plassen bak.
Ein som hadde lurt seg litt under vår Tysvær-radar var Georg Feed også han tysværbu, bur på Nappatjørn, men er frå Ølensvåg og syklar for Stavanger Terrengsykkelklubb, Bros Test Team. Han blei nummer fire med tida 1,49.41.
Anna Stray Rongve vann kvinneklassen og fekk registrert tida 2.15,48. Ho leda frå start til mål.
Meir om rittet kjem i papiravisa på torsdag.