Førre veke blei det klart at Gina Gedick er klar for ungdomslandslaget. Denne veka kom uttaket til junior og U21-landslaget i forbindelse med Nordisk Meisterskap i Danmark 10-11. august. Med på juniorlaget fekk Tysvær kano- og kajakklubb heile fire utøvarar, Sofie Dybdal, Stian Kallekodt, Trygve Staupe og Steffen Larsen.
– Sofie og Stian har vært aktuelle for juniorlaget heile sesongen, og med dei gode resultata under NC3 i Bergen i slutten av juni, sikra dei seg plassar på laget, fortel trenar Lavrans Eikje.
Det har vore meir usikkert om Trygve Staupe og Steffen Larsen ville komme med på laget, resultata deira har vore svært gode, med fleire pallplasseringar, men – som Tysvær Bygdeblad har skrive om tidlegare så har sjukdom og eksamenar satt hinder.
– Det hindra dei i å delta på NC2, som var eit av uttaksstemnene. Likevel var resultata deira under NC1 og NC3 så sterke at landslagsleiinga likevel ville ha dei med til Nordisk, seier Eikje.
Ullvang på veg
På U21 laget finn me – ikkje så overraskande, Christina Vedø som har kjørt sterkt heile sesongen – med to sigrar og mange pallplasseringar i Noregs Cupen.
– Christina reiser i helga til Italia for å delta i eit internasjonalt stemne, der Noregs Padleforbund har plukket ut to seniorjenter og fire juniorjenter til å representere Noreg. Christina skal blant anna kjøre K1 200m og 500m samt K2 200m, 500m og 1000m saman med Heidi Helledal frå Flekkefjord kajakklubb, fortel trenar Lavrans Eikje.
Det såg mørkt ut Lars Magne Ullvang i vår fekk påvist kyssesjuke. Ein frykta at heile sesongen rauk. Men no, ser det ut som om det er lys i tunnelen for stortalentet.
– Lars Magne er på betrings veg, og om han er i trening igjen, innan midten av juli så vil også han bli med U21 laget til Danmark, fortel Eikje.
Det betyr at Tysvær kano- og kajakklubb har med seg minimum seks utøvarar til Nordisk Meisterskap i august – aller helst sju.