Fekk poeng i siste sekund

Første omgang mellom karmøybuane og tysværbuane var av det heller daffe slaget. Tre daudballar og tre mål til tross. For det var lite som skjedde i nærleiken av måla. Alexander Gundersen stussa inn 1-1 etter 20 minuttar, etter at Olav Lauvås hadde prika inn 1-0 berre minuttar tidlegare. Så skjedde det rett og slett ingenting før Espen Jakobsen pirka inn 2-1 sekundar før pause.

– Angrip
I pausen nytta Skjold-trenar Helge Risanger sjansen til å minne laget på kva dei var i ferd med å gjere. Alt for tafatt spel og berre tapte duellar.
– Eg gav klar beskjed om at me skulle bli mykje tøffare og angripe raskare. Det gav resultat for me kjørte nesten heile omgangen. Me fekk mange store sjansar og burde vel strengt tatt hatt me oss alle poenga. Men når me brant sjanse etter sjanse må me vere nøgde med det poenget me fekk, seier Risanger.
Hilberg Nemeth hadde dei største sjansane då han fekk ein trippelsjanse kor han ikkje klarte å løfte ballen over ein liggande Skudenes-spelar på streken. Men då klokka til dommaren begynte å nærme seg 90 minutt fekk Alexander Gundersen ein pasning like utanføre 16-meteren. Han satte fart inn i feltet og blei klønete takla og dommar Tore Risanger hadde ingen andre val. Det måtte bli straffe.
– Eg fekk beskjed av Jonas (Risanger) at eg skulle ta straffen. Eg tenkte ikkje på klokka. Trudde faktisk det var ti minuttar igjen. Men den måtte inn og det var herleg, for det blei mykje sløsing i dag, sa Hettervik, som kanskje var den som sto mest fram då det trengtest som mest på eit jamnt Skjold-lag.
Etter ein dårleg førsteomgang heva dei seg og dermed held dei karmøybuane bak seg på tabellen.

Meir om kampen og spelarbørs i avisa på neste torsdag.