I dag delte ordførar Sigmund Lier tankar om både året som gjekk og året som kjem under Nyttårsmottakinga på Tysværtunet. Mange blei også heidra med ymse prisar, og til ståande applaus mottok Bjørg Elisabeth Førre Kongens fortenestemedalje.

Bjørg Elisabeth Førre fekk Kongens fortenestemedalje under årets nyttårsmottaking på Tysværtunet. Foto: Ingvild R. Myklebust

Gjorde stas på Tysvær

I dag delte ordførar Sigmund Lier tankar om både året som gjekk og året som kjem under Nyttårsmottakinga på Tysværtunet. Mange blei også heidra med ymse prisar, og til ståande applaus mottok Bjørg Elisabeth Førre Kongens fortenestemedalje.

av Ingvild Rørtveit Myklebust

– Det er stort å få Kongens fortenestemedalje. Eg visste ingenting på førehand, seier Bjørg Elisabeth Førre, medan ho mottar eit utal klemmar og helsingar etter nyttårsmottakinga.

Folk hadde verkeleg gått mann av huse for å med seg årets Nyttårsmottaking på Tysværtunet. Heile storsalen var stappfull, og ein måtte ta i bruk Nygårdssalen der det som skjedde på scena i storsalen blei videooverført.

Ordførar Sigmund Lier heldt sin nyttårstale til publikum, der han mellom anna snakka om at 2016 var eit vanskeleg år for mange bedrifter i kommunen, i tider med ned nedbemanning og tomme ordrebøker. Ordføraren sa at han håpar næringa tar seg opp igjen, med fleire oppdrag.
Lier retta i sin nyttårstale ei stor takk til den frivillige sektoren i kommunen. «Dei frivillige laga er limet i samfunnet vårt», uttalte han, og drog fram mellom anna LHL som samlar mange kvar veke, Hervik ungdomslag som fylte 70 år i 2016 og Friskis og svettis som tilbyr trening rundt om i kommunen.

Det blei framført fleire ypparlege musikkinnslag under nyttårsmottakinga. Ei blåsegruppe i leiing av Kjetil Djønne opna det heile, og den mektige musikken fekk garantert hår til å reise seg på armane til dei frammøtte. Duoen «Into Waves» framførte flott song og Jan-Magnar Andersen Gard spelte facinerande, nydelege tonar vibrafon.

Desse prisane blei delt ut under ordføraren si nyttårsmottaking:

Næringslivsprisen: Falkeid Gård, mottatt av Svein Helge Høyvik. Fire generasjonar har drifta garden i Tysværvåg – ein familie som har vore ein svært engasjert og fagorganisert familie. I juryen sin grunngjeving for prisen, kjem det fram at «Dei har vore genuine i det å sjå moglegheitane, slik at jordbruket blir effektivisert og leggast til rette for også kommande generasjonar.»

Tysværdiplom:

Monica Dahle – Norgesmeister i veteran innan vektløfting i 2016.

Paul Steinar Dalaker – Kokkelærling og har i 2016 vunne Haugalandscup for lærlingar innan kokkefaget.

Åsmund Kringeland – Blei i 2016 Norgesmeister i saueklipping, og skal representere Norge i VM på New Zealand i februar.

Jonathan Gerhard Håkull – Blei i 2016 Norgesmeister i ullhandtering, og skal representere Norge i VM på New Zealand i februar.

Ellen Annette Mogensen Gutubakken – Tok sølvmedalje i Nordisk baltisk meisterskap i distanseriding i 2016, og har også vunne NM i lagritt.

Zekiye Cemsoylu Nyland – Var Norgesmeister Senior i vektløfting i 2016, tok 3. plass i Nordisk meisterskap og deltok i EM i Førde.

Kulturstipend: Into Waves (Anne Kvinnesland og Victoria Lønning) og Elise Austevoll Erland.

Kulturvernprisen: Lensmannshuset på Årvik – Karin Klepmo og Asbjørn Kvinnesland.

Kongens fortenestemedalje: Bjørg Elisabeth Førre. Mellom anna for sitt arbeid i Førre Sanitetsforeining i 22 år, sin aktivitet i Førre bedehus og sin innsats for Førresfjorden kyrkjelyd.

Les meir i papirutgåva på torsdag.